एक मधेश एक प्रदेश अस्वीकार'

'एक मधेश एक प्रदेश अस्वीकार'
सात दल एक मधेश एक प्रदेशको विपक्षमा उभिएका छन् । ११ फागुनमा बसेको सात दलका शिर्ष नेताको बैठकले मुलुकको स्वतन्त्रता र सुरक्षामा आघात पर्नसक्ने भन्दै आत्मनिर्णयसहित 'एक मधेश एक प्रदेश' मा नजाने निर्णय गरेको हो ।
प्रधानमन्त्री निवास बालुवाटामा बसेको बैठकबारे जानकारी दिनुहुदै संयुक्त वामोर्चाका अध्यक्ष सीपी मैनाली सातै दलका नेताहरु एक मधेश एक प्रदेशको विपक्षमा उभिनुभएको बताउनुभयो । 'कसैले माग उठाउंछ भने अन्यथा लिदैनौं,' उहांले भन्नुभयो,'एक मधेश एक प्रदेशमा जांदा मुलुकको राष्ट्रियता र स्वतन्त्रतामा खतरा उत्पन्न हुन्छ भन्ने हाम्रो ठहर छ ।' सात दलले मधेशका आन्दोलनरत पक्षसंग वार्ता जारी राख्ने निर्यण गरेको मैनालीको भनाई थियो । वार्ताबाटै समस्याको हल खोज्न सकिने भन्दै स्वयत्ततासहितको संघात्मक राज्यप्रणाली आफूहरुको बटमलाइन भएको स्पष्ट पार्नुभयो ।
चुनाव तोकिएको मितिमा हुने दाबी गर्दै भन्नुभयो,'नेपाली जनता चुनावको पक्षमा रहेकाले चैतमा सफलताका साथ सम्पन्न गर्न सात दल दृढ छन् ।' मधेशी नेताहरुले जुन मनशायले माग उठाएपनि त्यसले अस्थिरता र असुरक्षा सृजना गर्ने उहांको भनाई थियो ।
संयुक्त लोकतान्त्रिक मधेशी मोर्चाले एक मधेश एक प्रदेशको माग नछाडेको र सरकारले उक्त माग पूरा नगर्ने स्पष्ट भएपछि जारी वार्ता धरापमा परेको छ । मोर्चाले आन्दोलन चर्काउने बताएको छ । संयुक्त लोकतान्त्रिक मधेसी मोर्चाको प्रमुख घटक तर्राई मधेश लोकतान्त्रिक पार्टीका नेता महेन्द्र यादवले आत्मनिर्णयको अधिकारसहित एक मधेश एक प्रदेशको मागबाट पछि नहट्ने अडान दोहोर्‍याउनुभयो । उहांले आन्दोलन चर्काउन आफूहरु मधेशमै जाने बताउनुभयो । यादवले भन्नुभयो, 'हामी अब विराटनगर, भैरहवा, जनकपुर र वीरगन्ज गरी चार ठाउँमा क्याप खडा गरेर आन्दोलन चर्काउँछौं । आज हाम्रो वार्ताको अन्तिम दिन हो ।'