बन्दको बाह्रौ दिन पनि जनजीवन कष्टकर

बन्दको बाह्रौ दिन पनि जनजीवन कष्टकर

एक मधेश एक प्रदेशको मुख्य मागसहित संयुक्त लोकतान्त्रिक मधेशी मोर्चाले आव्हान गरेको बन्दले १२औं दिन पनि तराईको जनजीवन प्रभावित बनेको छ।लगातारको बन्दमाथि थपिएको कर्फ्युले जनजीवन थप कष्टकटर बनेको छ। मुलुकको विभिन्न स्थानमा शनिबार साँझदेखि लगाइएको कर्फ्यु आइतबार बिहान हटेपछि सर्वसाधारणको चहलपहल बढेको बताइएको छ । यद्यपि बन्दले बजार पसल पूर्ण रुपमा ठप्प रहेकाले अत्यावश्यकीय सामाग्रीको अभावमा सर्वसाधारणले सहज महशुस गर्न सकेका छैनन् ।जीवनयापनमा कठिनाई उत्पन्न भएपछि केही स्थानमा बन्द र कर्फ्युको अवज्ञा समेत हुन थालेको छ । प्रदर्शनकारीले सुनसरीको दुहवी, भण्टाबारीलगायतका क्षेत्रमा कर्फ्युको अवज्ञा गरी प्रदर्शन गरेका छन् ।
सुरक्षाकर्मीले फकवान, हलुवाई र मंगला मियालाई सो क्रममा पक्राउ गरेको छ।प्रदर्शनका क्रममा सुरक्षाकर्मीले कैयौ राउण्ड हवाई फायर गरेको आन्दोलनकारीहरुले दावी गरेका छन् । दुहवी बजार रातभर तनावग्रस्त रहेकाले सुरक्षा व्यवस्था कडा पारिएको सशस्त्र प्रहरी उपरीक्षक नगेन्द्र थापाले जानकारी दिनुभयो ।
पूर्व पश्चिम राजमार्ग खण्डको कोशी ब्यारेजबाट चार दर्जन बढी सवारी साधनलाई स्कटिङ गरी इटहरी पुर्‍याइएको छ।यसैबीच सुनसरीमा शनिबार एम्बुलेन्स तोडफोड भएको विरोधमा आइतबारदेखि त्यहाँ सम्पूर्ण एम्बुलेन्स सेवा बन्द गरिएको छ। प्रदर्शनकारीले शनिबार साँझ नेपाल रेडक्रस सोसाइटी इनरुवा उपशाखाको एम्बुलेन्स तोडफोड गरेका थिए ।
सुनसरी सदरमुकाम इनरुवामा इटहरी-झम्का, धरान र इनरुवालगायत स्थानका दर्जनौ एम्बुलेन्स पूर्व पश्चिम राजमार्गको इनरुवा खण्डमा बाटोमा तेर्स्याइएका छन् ।

त्यस्तै झापाको बैगुन्धुरा स्रोत केन्द्र अन्तर्गतका १८ विद्यालय बन्दका बावजुद आइतबारबाट संचालन हुने भएका छन् । ती विद्यालयका प्रधानाध्यापक तथा व्यवस्थापन समितिको शनिबार बसेको बैठकले पठनपाठन प्रभावित भएको भन्दै विद्यालय संचालन गर्ने निर्णय गरेको हो ।