सरकार र दुवै मोर्चाबीच पुनः वार्ताको तयारी

सरकार र दुवै मोर्चाबीच पुनः वार्ताको तयारी

मधेशमा आन्दोलनरत संयुक्त लोकतान्त्रिक मधेशी मोर्चा र सरकारबीच सहमतिका लागि सोमबार बिहान पुनः वार्ता हुने भएको छ। प्रधानमन्त्री निवास बालुवाटारमा हुने भनिएको वार्ता निष्कर्षमा पुग्ने दुवै पक्षले विश्वास व्यक्त गरेका छन् ।आइतबार राति १० बजेदेखि सुरु भएको वार्ता संघीय प्रणालीअन्तर्गत स्वायत्त प्रदेश निर्माण गर्ने कुरामा सहमति नजिक पुगेको दावी गरिएको छ। बिहान ४ बजेसम्म चलेको वार्ता सकारात्मक रहेको बताइए पनि कुनै निष्कर्ष भने निस्कने सकेन ।वार्तामा सहभागी सरकारी स्रोतकाअनुसार मोर्चाले कुराकानी सहमति नजिक पुग्न लाग्दा पुनः अन्तरिम संविधान संशोधन र चैन २८ गतेका लागि निर्धारित संविधानसभा निर्वाचनको मिति पर सार्नुपर्ने माग राखेपछि वार्ता निष्कर्षमा पुग्न नसकेको हो ।मोर्चाको एक मधेश एक प्रदेशको मागमा मधेश लगायत अन्य प्रदेशको स्वायत्ततासम्बन्धमा अग्रसर हुने भन्ने वाक्यांश उल्लेख गर्न सरकार सहमत भएको छ। त्यस्तै मधेश आन्दोलनमा मारिएकाहरुको परिवारलाई सहिदका परिवारसरह क्षतिपुर्ति दिन पनि सरकार सहमत भएको मोर्चाका नेता हृदयश त्रिपाठीले जानकारी दिएका छन् ।
यसैबीच मधेशी नेताहरु यो समाचार पार्दै गर्दा आन्तरिक छलफलमा व्यस्त रहेको बताइएको छ।त्यसैगरी सरकारी वार्ता टोली र संघीय गणतान्त्रिक राष्ट्रिय मोर्चाबीच सोमबार पनि वार्ता हुने बताइएको छ।राजधानीको याक एण्ड यति होटलमा आइतबार भएको वार्ता बिना निष्कर्ष टुंगिएपछि सोमबार पुनः वार्ता हुन लागेको हो ।सरकारी वार्ता टोली संयोजक शान्ति तथा पुनःनिर्माण मन्त्री रामचन्द्र पौडेलले आइतबार मिल्न नसकेका केही प्राविधिक विषयमा आजको वार्तामा टुंगोमा पुगिने आशा व्यक्त गर्नुभयो । यता आठ वटा समूह सम्मिलित मोर्चाले आइतबारको वार्ता बिना निष्कर्ष टुंगिएको र आज कुनै वार्ता नहुने जनाएको छ।मोर्चाका किशोरकुमार विश्वासले सरकारी टोली वार्तामा इमान्दार रुपमा प्रस्तुत नभएको आरोप लगाउनुभयो । मन्त्री पौडेलले भने आइतबारको वार्तामा सोमबार पुनः छलफल गर्ने सहमति भएको र सहमति पालना नगर्ने पक्ष नै वार्ताप्रति गम्भीर नभएको उल्लेख गर्नुभयो ।आत्मनिर्णयको अधिकारसहित स्वायत्त राज्यको घोषणालगायत तीन सूत्रीय माग राखी मोर्चा लामो समयदेखि आन्दोलनरत छ ।