आयोगद्वारा उम्मेदवारी दिने म्याद थप

आयोगद्वारा उम्मेदवारी दिने म्याद थप

सरकार र संयुक्त लोकतान्त्रिक मधेशी मोर्चाबीच भएको सहमतिअनुसार संविधानसभा निर्वाचनको समानुपातिक र प्रत्यक्ष प्रणालीतर्फ उम्मेदवारी दिनका लागि निर्वाचन आयोगले एक दिनको म्याद थप गरेको छ।आयोगले समानुपातिक प्रणालीतर्फ बन्द सूची पेस गर्नका लागि यही फागुन १९ गतेका दिन तोकेको छ। त्यस्तै प्रत्यक्षतर्फ उम्मेदवारको मनोनयन दर्ताका लागि २३ गतेको दिन तोकिएको छ।सरकार र संयुक्त लोकतान्त्रिक मधेशी मोर्चाबीच आठ बुँदे सहमति भएपछि उम्मेदवारी नदिएका दलहरुलाई उम्मेदवारी दिने अवसर प्रदान गर्न अनुरोध गर्दै मन्त्रिपरिषदले बिहीबार साँझ आयोगलाई औपचारिक पत्र पठाएको थियो । सरकारको पत्र पाएपछि आयोगको बिहीबार राति बसेको बैठकले म्याद थप गर्ने निर्णय गरेको निर्वाचन आयुक्त निलकण्ठ उप्रेतीले बताउनुभयो ।उम्मेदवारी दिने म्याद बढाइए पनि निर्वाचन भने चैत २८ गते नै हुनेछ । आयोगमा दर्ता भएका तर समानुपातिक प्रणालीका लागि यसअघि गत ८ र १२ गते उम्मेदवारको बन्द सूची नबुझाएका र प्रत्यक्ष प्रणालीका लागि १३ गते उम्मेदवारी नदिएका दलहरले आयोगले थप गरेको म्यादमा उम्मेदवारी दिन पाउनेछन् ।