सरकार र मधेशी फोरमबीच ८ बुँदे सहमति, मधेश बन्द फिर्ता

सरकार र मधेशी फोरमबीच ८ बुँदे सहमति, मधेश बन्द फिर्ता


सरकार र तराईमा आन्दोलनरत संयुक्त लोकतान्त्रिक मधेशी मोर्चाबीच बिहीबार औपचारिक सहमति हुँदैछ । प्रधानमन्त्री निवास बालुवाटारमा केहीबेरपछि विशेष कार्यक्रमका बीच प्रधानमन्त्री र मोर्चा अवद्ध तीन दलका प्रमुखहरुले सहमतिपत्रमा हस्ताक्षर गर्ने मोर्चाका नेता अनिल कुमार झाले बताउनुभयो ।अहिलेसम्मको वार्ताबाट दुई पक्षले सहमतिको आठ बुँदे मस्यौदा तयार गरेका छन् । केही बुँदाका शब्दमा रहेका असहमति हटाई सहमति पत्रलाई अन्तिम रुप दिन सत्तारुढ प्रमुख तीन दल र मोर्चाका नेताहरुबीच प्रधानमन्त्री निवास बालुवाटारमा वार्ताको तयारी भइरहेको छ। वार्तामा प्रधानमन्त्री एवं कांग्रेस सभापति गिरिजाप्रसाद कोइराला, एमाले महासचिव माधवकुमार नेपाल, गृहमन्त्री कृष्णप्रसाद सिटौला, माओवादी नेताहरु डा. बाबुराम भट्टराई र रामबहादुर थापा बादल र मोर्चाका नेताहरु महन्थ ठाकुर, राजेन्द्र महतो, उपेन्द्र यादव, हृदयश त्रिपाठी, रेणु यादव, अनिल कुमार झालगायतका नेताहरु सहभागी हुनेछन् ।मोर्चाको ६ बुँदे मागमा सरकारले यसअघि नै सहमति जनाए पनि मोर्चाका नेताहरुले संविधानसभा निर्वाचन पर सार्नुपर्ने र सेनामा मधेशीलाई सामूहिक प्रवेश दिनुपर्ने नयाँ सर्त अघि सारेपछि वार्ता लम्बिएको थियो ।निर्वाचन चैत २८ गते नै गर्ने गरी मोर्चा आवद्ध दललाई निर्वाचन तयारीका लागि केही समय उपलव्ध गराउन सरकार तयार भएपछि सहमतिको बाटो खुलेको हो ।सत्ताधारी प्रमुख तीन दलका शिर्षस्थ नेताहरुले निर्वाचन कार्यक्रम पर सार्न निर्वाचन आयोगलाई आग्रह गर्न सरकारलाई निर्देशनसमेत दिएका छन् ।स्रोतकाअनुसार सेनामा मधेशीको सामूहिक प्रतिनिधित्व सम्बन्धी मागमा मोर्चा लचिलो भएपछि सहमति पत्रमा सामूहिक शब्द हटाइएको छ। तर, समानुपातिक रुपमा सेनामा मधेशीको प्रतिनिधित्व बढाउँदै लैजाने सहमति भएको स्रोतले जनाएको छ। दुई पक्षबीच संघीय प्रणालीभित्र मधेशलगायत विभिन्न स्वायत्त प्रदेश हुने र प्रदेशका अधिकार संविधानसभाले निर्धारण गर्ने सहमति पनि भएको छ।यसअघि ६ बुँदामा समेटिएको आत्मनिर्णयको माग मोर्चाले त्यागेको छ। मोर्चाको एक घटक मधेशी जनअधिकार फोरमका संयोजक उपेन्द्र यादवका अनुसार केन्द्रीय र राज्य सूचीका आधारमा अधिकारको बाँडफाँड गरिनेछ । त्यसरी नै प्रान्तहरुसमेत अधिकार सम्पन्न र स्वायत्त हुनेछन् ।२० प्रतिशतभन्दा बढी उम्मेदवार उठाउने दलले महिला, दलित, जनजातिलगायतको समूहलाई स्थान छुट्याउनुपर्ने व्यवस्था ३० प्रतिशत बनाउन पनि सहमति भएको छ। मोर्चाले सो प्रतिशत ५० प्रतिशत पुर्‍याउनुपर्ने माग राखेको थियो ।आज सहमति पत्रमा हस्ताक्षर भएपछि मोर्चाले तराईमा विगत १६ दिनदेखि जारी राखेको अनिश्चितकालीन आमहड्ताल फिर्ता लिने फोरम संयोजक यादवले बताउनुभयो ।