मधेशमा आन्दोलनरत दुवै मोर्चासँग आज पनि वार्ता हुने

मधेशमा आन्दोलनरत दुवै मोर्चासँग आज पनि वार्ता हुने

सरकार र संयुक्त लोकतान्त्रिक मधेशी मोर्चाबीच बिहीबार पनि वार्ता हुने भएको छ। प्रधानमन्त्री निवास बालुवाटारमा बिहान १० बजे हुने भनिएको वार्ता निर्णायक हुने मधेशी नेता महेन्द्रप्रसाद यादवले दावी गरेका छन् । तर, विगत केही दिनदेखि हरेक दिन हरेक घण्टा निर्णायक हुने भनिएको वार्ताको परिणाम के हुने भन्ने स्पष्ट भइसकेको छैन ।मधेश समस्या समाधानका लागि सरकार र मधेशी मोर्चाबीच केही दिनदेखि छलफल जारी रहे पनि निष्कर्षमा पुग्न सकेको छैन । मधेशी मोर्चाले राखेको ६ बुँदे मागमा सहमति हुन लागेपछि उसले संविधानसभा निर्वाचन सार्न गरेको प्रस्ताव र सो मागमा चौतर्फी विरोध भएपछि सेनामा मधेशीको सामुहिक प्रवेशको माग अघि सारेर मोर्चाले वार्तामा अत्तो थापेको आरोप सरकारी पक्षले लगाउँदै आएको छ।मधेशी मोर्चाले पछिल्लो समयमा नेपाली सेनामा मधेशीको सामुहिक प्रवेश तत्काल गराउनुपर्ने सर्तमा अडान राखेको छ। आजको वार्तामा पनि सोही विषयमा छलफल हुने यादवले बताए । त्यसअघि वार्ताको तयारीका लागि मधेशी नेताहरुले आन्तरिक छलफल गरिरहेको बताइएको छ।त्यसैगरी पूर्वी तराई पहाडमा आन्दोलनरत संघीय गणतान्त्रिक राष्ट्रिय मोर्चा र सरकारबीच पनि बिहीबार नै पुनः औपचारिक वार्ता हुने भएको छ। दुवै पक्षबीच बुधबार भएको अनौपचारिक छलफलमा भएका सहमतिलाई अन्तिम टुंगोमा पुर्‍याउन बिहीबार अपरान्ह २ बजे वार्तामा बस्न लागेको सरकारी स्रोतले जनाएको छ। वार्ताको समय तय भए पनि स्थानमा भने टुंगो लाग्न बाँकी रहेको बताइएको छ।मोर्चामा आवद्ध मधेशी जनअधिकार फोरम मधेशका उपाध्यक्ष किशोरकुमार विश्वासले सरकारी पक्षको गृहकार्यमा वार्ताको सफलता र असफलता निर्भर गर्ने बताए । जातीय जनसंख्याको आधारमा पूर्ण समानुपातिक निर्वाचनको माग अघि सारेको मोर्चाले सरकार त्यसमा सहमत नभएको जनाएको छ। विश्वासले आफूहरु चैत २८ मै निर्वाचन हुनुपर्नेमा अडिग रहेकाले सरकारी पक्षले आवश्यक गृहकार्यसहित वार्तामा आए आजै सहमति बन्न सक्ने बताए ।