एक मधेश एक प्रदेशबाहेक तराईको सबै माग पुरा गर्न सात दल तयार

एक मधेश एक प्रदेशबाहेक तराईको सबै माग पुरा गर्न सात दल तयार

सत्ता साझेदार सात दलले मधेशवादी दलले उठाएका ६ बुँदे मागमध्ये एउटाबाहेक अन्य सबै पुरा गर्ने निर्णय गरेका छन् । मधेशका मागसम्बन्धमा सात दलको धारणा बनाउन प्रधानमन्त्री निवास बालुवाटारमा ११ फागुनमा बसेको सात दलको बैठकले एक मधेश एक प्रदेशबाहेक अन्य सबै माग पुरा गरेर अघि बढ्ने निर्णय गरेको हो ।
एमाले नेता झलनाथ खनालकाअनुसार प्रदेशहरु विभाजन गर्ने काम संविधानसभाले गर्ने भएकाले तत्काल पुरा गर्न नसकिने निर्णय भएको छ। बैठकपछि सात दलद्वारा जारी संयुक्त विज्ञप्तिमा मधेशी समुदायले उठाएका अधिकांश मागहरु यसअघि नै पुरा भएको उल्लेख गर्दै पछिल्लो मागलाई सकारात्मक रुपमा लिदै वार्ताबाटै समस्या समाधानमा पुग्नुपर्ने उल्लेख छ ।सात दले चैत २८ गतेको संविधानसभा निर्वाचनमा दृढतापूर्वक अघि बढ्न सम्पूर्ण सबैमा अपिलसमेत गरेका छन् ।
सात दलले राष्ट्रिय अखण्डतामा आँच आउने बाहेकका माग पुरा गर्न तयार रहेको जनाउँदै वार्ताबाट निकासमा पुग्न मधेशवादी दलहरुलाई आव्हानसमेत गरेका छन् ।बैठकले भारतीय दूतावासमा कांग्रेस नेता र मधेशी नेताहरुबीच भएको वार्ता राष्ट्रिय अस्मिताविपरीत भएको भन्दै भर्त्सना गरेको बाममोर्चा नेता सीपी मैनालीले बताउनुभयो ।शुक्रबार संयुक्त लोकतान्त्रिक मधेशी मोर्चा र सरकारबीच भएको वार्तामा मधेशी नेताहरुले दलहरुको एउटै धारणा नरहेको बताएपछि शनिबार सात दलको बैठक बसेको हो ।
बैठकमा प्रधानमन्त्री गिरिजाप्रसाद कोइराला, एमाले महासचिव माधवकुमार नेपाल, माओवादी अध्यक्ष प्रचण्डलगायत सातै दलका शिर्षस्थ नेताहरु सहभागी थिए।