प्रचण्डद्वारा संयम हुन आग्रह

प्रचण्डद्वारा संयम हुन आग्रह

नेकपा माओवादीका अध्यक्ष प्रचण्डले देशभरका कार्यकर्तालाई संयम हुन आग्रह गर्नुभएको छ । अर्घाखांचीमा नेकपा एमालेका कार्यकर्तासंगको झडपमा घाइते भएका आफ्ना एक कार्यकर्ता मारिएपछि स्थिति तनावग्रस्त हुन नदिन उहांले उक्त आग्रह गर्नुभएको हो ।
'घटनाका दोषीलाई सरकारले कारबाही गर्नुपर्छ,' प्रचण्डले भन्नुभयो,'शोकलाई शक्तिमा बदली संयम भएर चुनावमा पार्टीलाई विजयी बनाउने अभियानमा जुटौं ।' उहांले देशी विदेशी प्रतिक्रियावादी चुनाव भाड्ने षड्यन्त्रमा लागेको समयमा घटनालाई माध्यम बनाएर थप खतरा उत्पन्न गराउने खेल हुनसक्नेतर्फ सचेत गराउनुभयो ।
नेकपा एमाले र नेकपा माओवादीका कार्यकर्ताबीच भिडन्त हुंदा माओवादी कार्यकर्ता राजेन्द्र बन्जाडा मारिएका थिए । ११ फागुनमा अर्घाखांचीमा चुनावी प्रचारप्रसारमा लागेका दुवै समूहबीच भिडन्त हुदा घाइते भएका राजेन्द्र बन्जाडाको राजधानीमा उपचारका क्रममा मृत्यु भएको हो । भित्ते लेखनमा विवाद हुदा बन्जाडासहित चार माओवादी कार्यकर्ता घाइते भएका थिए ।