गणतान्त्रिक मोर्चासँग पनि राजधानीमा वार्ता सुरु

गणतान्त्रिक मोर्चासँग पनि राजधानीमा वार्ता सुरु

पूर्वी तराई तथा पहाडमा आन्दोलनरत संघीय गणतान्त्रिक मोर्चा र सरकारबीच वार्ता सुरु भएको छ। दुवै पक्षबीच बुधबार भएको अनौपचारिक छलफलमा भएको सहमतिलाई अन्तिम टुंगोमा पुर्‍याउन ललितपुरको पाटनढोकास्थित यलमाया केन्द्रमा वार्ता सुरु भएको हो ।वार्तामा सरकारका तर्फबाट शान्ति तथा पुनःनिर्माण मन्त्री रामचन्द्र पौडेल, स्थानीय विकास मन्त्री देव गुरुङ, एमाले नेता झलनाथ खनाल, नेमकिपाका सुनिल प्रजापति तथा मोर्चाकातर्फबाट अध्यक्ष कमल छाराहाङ, मधेशी जनअधिकार फोरम भाग्यनाथ गुप्ता समूहका उपाध्यक्ष किशोरकुमार विश्वास, संघीय लिम्बूवान राज्य परिषदका अध्यक्ष कुमार लिङदेन, ताम्सालिङ स्वायत्त प्रदेशका डीके बुद्धिष्ट, थारु राष्ट्रिय मोर्चाका लक्ष्मण थारु, दलित जानजाति पार्टीका विश्वेन्द्र पासवानलगायतको सहभागिता रहेको छ ।विश्वासले आफूहरु चैत २८ मै निर्वाचन हुनुपर्नेमा अडिग रहेकाले सरकारी पक्ष लचिलो भए आजै सहमति बन्न सक्ने बताउनुभयो ।जातीय जनसंख्याको आधारमा पूर्ण समानुपातिक निर्वाचन प्रणाली, संघीय गणतन्त्र घोषणा, यसअघिका सहमति कार्यन्वनयलगायतका माग राख्दै मोर्चाले आन्दोलन गरिरहेको छ। विभिन्न जातीय संगठनसमेत सम्मिलित मोर्चाको बन्दका कारण पूर्वी पहाडी जिल्लासहित तराईको जनजीवन विगत १६ दिनदेखि प्रभावित बन्दै आएको छ।