उम्मेदवार टुंगो लगाउन दल बैठकमा

उम्मेदवार टुंगो लगाउन दल बैठकमा

चैत्र २८ गते हुने संविधान सभा निर्वाचन अन्र्तगत प्रत्यक्ष चुनावका लागि दलहरुले उम्मेदवारको नामावलीलाई अन्तिम रुप दिने भएका छन् । १२ फागुनमा उम्मेदवारको अन्तिम टुंगो लगाउन दलहरु बैठक बस्ने भएका छन् ।
दलहरुले अधिकांश जिल्लामा उम्मेदवारको नामावली तय गरिसकेको र बांकि जिल्लामा आज टुङ्गो लगाइने बताएका छन् । निर्वाचन कार्यतालिका अन्र्तगत दलहरुले भोलि निर्वाचन आयोगमा उम्मेदवारको मनोनयन दर्ता गराउनुपर्नेछ ।
उम्मेदवार छनौटका विषयमा नेपाली कांग्रेसमा समस्या उत्पन्न भएको छ । असन्तुष्टिका कारण उसले २ सय ४० मध्ये १ सय क्षेत्रका उम्मेद्वारको मात्रै टुङ्गो लगाएको छ । कांग्रेसका महामन्त्री विमलेन्द्र निधिले केही जिल्लामा उम्मेद्वारी छनौटबारे विवाद रहेको र आज साँझ सम्म विवाद मिलाउने जानकारी दिनुभयो ।
उम्मेद्वारी छनौटबारे अन्तिम निर्णय गर्न कांग्रेस संसदीय समितिको बैठक बस्दैछ । प्रधानमन्त्री निवास वालुवाटारमा बस्ने वैठकमा विवाद क्षेत्रका विषयमा छलफल हुने कांग्रेस महामन्त्री निधिले जानकारी दिनुभयो ।
त्यस्तै उम्मेद्वारी छनौटबारे असन्तुष्ट रहेका कांग्रेस नेताहरुले भने छुट्टै छलफल गरिरहेका छन् । उनीहरुले कार्यवाहक सभापति सुशील कोइराला, वरिष्ठ नेता शेरबहादुर देउवा, शान्तिमन्त्री राचन्द्र पौडेलले आफूअनुकूल उम्मेदवार छानेको भन्दै आपत्ति जनाएका छन् ।
आज प्रधानमन्त्री गिरिजाप्रसाद कोइरालालाई भेटी त्यसविषयमा छलफल गर्ने कांग्रेस नेता विजयकुमार गच्छेदारले जानकारी दिनुभयो । स्रोतका अनुसार नेता विजयकुमार गच्छेदार, अर्जुननरसिंह केसी, गोविन्दराज जोशी, रामलक्ष्मण थारु, लक्ष्मण घिमिरेलगायतका नेताहरुले पार्टीले अहिलेकै तरिकाले उम्मेदारी छनौट गरे राजिनामा दिने समेत तयारी गरिरहेका छन् ।
उम्मेद्वारी छनौटलाई अन्तिम रुप दिन एमाले स्थायी समितिको बैठक पनि आजै बस्दैछ ।
दिउसो १२ बजे बस्ने बैठकमा केही ठाउंमा मात्रै बांकी रहेका उम्मेद्वारी छनौटलाई अन्तिम रुप दिने एमाले स्थायी समितिका सदस्य अमृतकुमार बोहराले जानकारी दिनुभयो । नेता बोहराका अनुसार एमालले २ सय ४० ओटै क्षेत्रमा उम्मेद्वारको टुङगो लगाइ सकेपनि केही प्राविधिक कुरा मिल्न बांकी छ ।
उम्मेद्वारको नामावली सार्वजनिक गरिसकेको नेकपा माओवादीले पनि आज केही नाममा फेरवदल हुनसक्ने जनाएको छ । उम्मेदवारको नामावलीलाई अन्तिम रुप दिन माओवादीको बैठक शुरु भएको छ । पार्टी कार्याल बुद्धनगरमा शुरु भएको बैठकमा उम्मेद्वारी दर्ता, संविधान सभा चुनावका बारे छलफल हुने नेकपा माओवादीका नेता दिनानाथ शर्माले जानकारी दिनुभयो ।
आजै नेकपा माले, मजदुर किसान पार्टीले भने उम्मेद्वारको नामावलीलाई अन्तिम रुप दिदैछन् । उम्मेद्वार छान्न नेकपा मालेको वैठक विहान ११ बजे बस्दैछ भने मजदुरकिसान पार्टीको बैठक दिउसो बस्नेछ ।