सरकार र मोर्चाबीचको सहमतिपछि तराईका हर्षोल्लास

सरकार र मोर्चाबीचको सहमतिपछि तराईका हर्षोल्लास


सरकार र संयुक्त लोकतान्त्रिक मधेशी मोर्चाबीच आठ बुंदे सहमति भएपछि लगातार दुई साताभन्दा बढीदेखि बन्द तराईका जिल्लाहरुमा हर्षोल्लासको वातावरण छ ।चोक चोकमा निस्केर आन्दोलनकारी मधेशीहरुले विजय जुलुस निकालेका छन् । शुक्रबार औपचारिक रुपमा विजय जुलुस निकालिने बताइएपछि बिहीबार नै स्वतस्फुर्त रुपमा विभिन्न क्षेत्रमा खुशीयाली जुलुस निस्किएका छन् ।सुनसरीबाट हाम्रा सहकर्मीहरुले जनाए अनुसार सहमतिको घोषणासँगै बन्द रहेका पसल, यातायातका साधन चलेका छन् । धरान, ईटहरी, धनकुटा लगायतका क्षेत्रमा जुलुस प्रदर्शन भएको छ । सरकारले लगाएको कफ्र्यू नहटे पनि स्वतःस्फुर्त रुपमा जुलुस निस्किएका छन् ।त्यस्तै भैरहवाबाट हाम्रा सहकर्मीले जनाए अनुसार त्यहाँ पनि बजारमा चहल पहल बढेको छ भने फोन मार्फत आन्देालनकारीहरुले एक अर्कामा खुशी बाँडेका छन् । भैरहवाबाट सुनवल, लुम्बिनी, परासी जाने यातायात अबरुद्ध भएकोमा छिट्टै खुल्ने तयारी भइरहेको छ । भैरहवामा पनि विजय जुलुस निकाल्ने तयारी भएको छ ।जनकपुरबाट हाम्रा सहकर्मी ईश्वरचन्द्र झाले जनाए अनुसार ८ बुंदे सहमति हुनेबित्तिकै स्थानीय बासिन्दाले खबरदारी जुलुस निकालेका छन् ।उनीहरुले सम्झौताको सही कार्यान्वयन हुनुपर्ने माग पनि गरेका छन् । शुक्रबार दिउँसो १ बजे विजय जुलुस निकाल्ने तय भएको छ । दैनिक उपभोग्य सामग्रीको अभावमा छटपटाएका सर्वसाधारणले अब राहतको आशा गरेको बताएका छन् । शुक्रबारलबाटै स्थिति सामान्यतर्फ फर्कने अपेक्षा पनि गरिएको छ । यस्तै बाराको जीतपुरमा पनि सहमति लगत्तै विजय जुलुस निस्किएको छ ।यसैगरी तराईका अन्य विभिन्न जिल्लामा पनि सहमतिको स्वागतमा जुलुस निस्किएका छन् ।