आन्दोलन चर्काउन भारतले पैसा बाडेको छ-सीपी मैनाली

आन्दोलन चर्काउन भारतले पैसा बाडेको छ-सीपी मैनाली

संयुक्त वाममोर्चाका अध्यक्ष सीपी मैनालीले मधेश आन्दोलन चर्काउन भारतले पैसाको खोलो बगाएको आरोप लगाउनुभएको छ । रिपोर्र्टर्स क्लब नेपालको साक्षात्कार कार्यक्रममा बोल्दै उहांले वीरगञ्जमा रहेका काउन्सल स्वयं पैसा बांड्न सक्रिय भएको बताउनुभयो ।
'नेपालमाथि बार्गेनिङ शक्ति बढाउन भारत मधेशमा आन्दोलन चर्काउन पैसाको खोलो बगाइरहेको छ,' मैनालीले भन्नुभयो,'वीरगञ्जमा खटाइएका भारतका काउन्सलर स्वयं सक्रिय भएर करोडौं पैसा बाडिरहेका छन् ।' नेपाल मामलामा भारतले दोहोरो चरित्र देखाएको आरोप लगाउदै कसैको दबाबमा एक मधेश एक प्रदेश स्वीकार नगरिने प्रष्ट पार्नुभयो । भारतको दबाबबाट सात दलका नेताहरु गल्छन् भनेरै भारतीय राजदूतावासमा बैठक डाक्न लगाइएको उहांको भनाई थियो । उहांले भन्नुभयो,'जो जो भारतीय राजदूतावासमा वार्ता गर्न गए उनीहरुले नेपाली जनतासामु माफी माग्नर्ुपर्छ ।'
रिपोर्र्टर्स क्लब नेपालका अध्यक्ष ऋषि धमलाको सभापतित्वमा सम्पन्न साक्षात्कार कार्यक्रममा बोल्दै मैनालीले चुनाव अघिनै एक मधेश एक प्रदेशको माग पूरा गर भन्नुलाई अलोकतान्त्रिक माग भन्नुभयो । उहांले भन्नुभयो,'मधेशका केही नेता तानाशाही माग उठाएर नेपाली जनताको शक्तिलाई उपेक्षा गर्न खोज्दैछन् ।' एक मधेश एक प्रदेशको माग कुनै हालतमा स्वीकार गर्न नसकिने बताउदै चुनावमा मत लिएर माग अनुमोदन गर्न चुनौती दिनुभयो ।
अन्तिम समयसम्म असन्तुष्टहरुलाई चुनावमा भाग लिन आग्रह गर्ने बताउदै कोही चुनावमा भाग लिदैन भन्दैमा सरकार चुनाव सम्पन्न गर्नबाट पछि नहट्ने बताउनुभयो ।
आन्दोलनरत संयुक्त लोकतान्त्रिक मधेशी मोर्चाको प्रमुख घटक सदभावना पार्टीका नेता एवं वार्ता कमिटिका सदस्य अनिलकुमार झाले आफूहरु एक मधेश एक प्रदेशको माग पूरा नभएसम्म निर्वाचनमा भाग नलिने बताउनुभयो । आफूहरु सार्थक संविधानसभाको पक्षमा रहेको दाबी गर्दै भन्नुभयो,'हामी बन्दसूची बुझाउन पनि जादैनौं, संविधानसभाको 'स' पनि थाहा छैन । आन्दोलन पनि रोक्दैनौं ।' आन्दोलनमा दमन भएको भन्दै सहिद र घाइतेको लिष्ट बनाइरहदा चुनावको उम्मेदवारको लिष्ट बनाउन नसक्ने बताउनुभयो । आफूहरु वार्ता विरोधी नभएको भन्दै आन्दोलन र वार्ता संगै अघि बढाउने जानकारी दिनुभयो । एक मधेश एक प्रदेशको ग्यारेन्टी गरिए आफूहरु चुनावको भाग नलिएपनि चुनाव हुन दिने बताउनुभयो ।

मधेशी जनता मुलुक बिखण्डनको पक्षमा नरहेको बताउनुभयो । सिंगो मधेश एक प्रदेश हुनुपर्ने भन्दै मधेश टुक्राएर प्रदेश बनाउन खोजे गम्भीर परिणाम भोग्नुपर्ने चेतावनी दिनुभयो । उहांले भन्नुभयो,'हामी प्रधानमन्त्री बन्न चाहेका हैनौं, मुख्यमन्त्री बन्न चाहेका छौं ।' भारतीय राजदूतावासमा वार्ता गर्नुलाई तोडमोड गरी आपत्ती गर्न नहुने बताउनुभयो । उहांले भन्नुभयो,'कालापानीमा झण्डा लिएर ब्रिफकेश बोकेर आउन हुने, हामी भारतीय राजदूतावासमा वार्ता गर्न जान किन नहुने ?'

नेकपा एमाले स्थायी कमिटि सदस्य मोदनाथ प्रश्रतिले एक मधेश एक प्रदेशको माग उठाउनेहरु मधेशमै अत्पमतमा रहेको बताउनुभयो । मधेशमा थारु समुदायका अलावा पहाडे मूलका बासिन्दा र दलितहरु एक मधेश एक प्रदेशको विपक्षमा रहेको भन्दै आन्दोलनकारीलाई संविधानसभामार्फत् त्यसलाई अनुमोदन गराउन चुनौती दिनुभयो । उहांले भन्नुभयो,'मधेशको ३३ प्रतिशत जनसंख्या ओगट्ने पहाडे मूलका जनता एक मधेश एक प्रदेशको विपक्षमा छन् । उत्तिकै संख्यामा रहेका थारु, मुसलमान, मूसहर, डुम, कोचे, मेचेहरु पनि पक्षमा छैनन् ।'

एक मधेश एक प्रदेशको माग उठाउनेहरु मधेशका अभिजात्य वर्ग र उनीहरुका समर्थक मात्र रहेको दाबी गर्नुभयो । माग उठाउनेहरु सामन्ती मनोवृत्तिबाट ग्रस्त रहेको आरोप लगाउनुभयो । दरबार र तर्राईका अभिजात्य वर्गको भित्री सांठगांठबाट मुलुकलाई सामन्ती युगमै फर्काने प्रयास भइरहेको उहांको आरोप थियो ।

मधेशका बहुसंख्यक जनताको भावना विपरितको बाटो लिइए गृहयुद्ध हुने खतरा औल्याउनुभयो । तेस्रोपटक पनि संविधानसभा निर्वाचन हुन नदिने षड्यन्त्र भइरहेको भन्दै त्यसप्रति सचेत हुन आग्रह गर्नुभयो ।

चुनाव भाड्न खोज्नेहरुको असली अनुहार समयले उजागर गर्ने भन्दै बलमिच्याईंको संस्कृति विकसित गर्न खोज्नेहरु स्वयं आफूले खनेको खाल्डोमा फस्ने बताउनुभयो ।