आज वार्ता सहमतिमा पुग्ने सम्भावना छः यादव

आज वार्ता सहमतिमा पुग्ने सम्भावना छः यादव

सरकार र तराईमा आन्दोलनरत संयुक्त लोकतान्त्रिक मोर्चाबीच लामो समयदेखि जारी वार्ता आज सहमतिमा पुग्ने अपेक्षा गरिएको छ।मोर्चामा आवद्ध मधेशी जनअधिकार फोरमका संयोजक उपेन्द्र यादवका अनुसार नेपाली सेनामा मधेशीको समूहगत प्रवेशबारे प्रधानमन्त्रीको प्रतिवद्धता आए दुई पक्षबीच जारी वार्ता आज सहमतिमा टुंगिनेछ ।दुई पक्षबीच सेनामा मधेशीको प्रवेशसम्बन्धी मुद्दामा मात्र सहमति हुन बाँकी छ। प्रधानमन्त्री निवासमा बिहान ११ बजेपछि हुने भनिएको वार्तामा सो विषयमा छलफल हुने यादवले जानकारी दिनुभयो । यादवकाअनुसार सहमति भए दुईपक्षबीच आजै एक समारोहबीच हस्ताक्षर गर्ने कार्यक्रम छ।मधेश समस्या समाधानका लागि सरकार र मधेशी मोर्चाबीच केही दिनदेखि वार्ता जारी रहे पनि निष्कर्षमा पुग्न सकिरहेको थिएन ।यसअघि सरकारले सम्पूर्ण प्रदेशहरु स्वायत्त हुने तथा स्वायत्त मधेश प्रदेश बनाउने प्रतिवद्धता जनाएपछि दुई पक्षबीच जारी वार्ता सहमतितर्फ अघि बढेको थियो । सरकारसँगको वार्ताअघि मोर्चाले तयारीका लागि आन्तरिक छलफल गरिरहेको बुझिएको छ।