मधेशवादी नेताको सर्त निर्वाचनविरोधी षड्यन्त्रः मन्त्री गुरुङ

मधेशवादी नेताको सर्त निर्वाचनविरोधी षड्यन्त्रः मन्त्री गुरुङ


स्थानीय विकास मन्त्री देव गुरुङले मधेशवादी नेताहरुले सहमतिको नाममा पछिल्लो पटक राखेको सर्त संविधानसभा निर्वाचन हुन नदिने षड्यन्त्र भएको आरोप लगाउनुभएको छ।यसको प्रतिकारमा दलका नेताहरु एक भएर निर्वाचनमा जानुको विकल्प नभएको उहाँले बताउनुभयो । पोखरामा मंगलबार बिहान क्रान्तिकारी पत्रकार संघले आयोजना गरेको पत्रकार भेटघाटमा मन्त्री गुरुङले मधेशवादी दलहरुसँगको वार्तामा संविधानसभा निर्वाचनविरोधी षड्यन्त्रकारी र भारतीय विस्तारवादी नीति हावी भएको टिप्पणी गर्नुभयो ।मधेशी जनताले उठाएका अधिकांश मुद्दा सम्बोधन गर्न सरकार तयार भएका बेला मधेशवादी नेताहरुले निर्वाचन सार्नुपर्ने र मधेशी सेना बनाउनुपर्ने अड्को थाप्नुले राष्ट्रियता र स्वाधिनतामा आघात पुगेको बताउनुभयो ।मन्त्री गुरुङले भारतीय दूतावासमा भएको छलफल र वार्ताले नेपाललाई सिक्किमी र भूटानीकरण गर्न लागिएको उल्लेख गर्नुभयो । नेपाली सेना र जनमुक्ति सेना परिचालनको कुरा विस्तृत शान्ति सम्झौता विपरीत हुने बताउँदै मन्त्री गुरुङले सेना परिचालनले निष्पर्ष निर्वाचनमाथि प्रश्न चिन्ह लाग्ने बताउनुभयो ।