मधेशवादी दलले आज पनि बन्द सूची नबुझाउने

मधेशवादी दलले आज पनि बन्द सूची नबुझाउने


समानुपातिक निर्वाचन प्रणालीतर्फ बन्द सूची दर्ता गर्न निर्वाचन आयोगले आज एक दिन थपे पनि छुटेका दलहरुले बन्द सुची नबुझाउने बताएका छन् । यही फागुन ८ गते सत्तारुढ दल र राष्ट्रिय प्रजातन्त्र पार्टीलगायतका ३७ दलले बन्द सूची बुझाएका थिए ।तर, ७४ वटा दल निर्वाचन आयोगमा दर्ता भएकोमा मधेशमा आन्दोलनरत दलका साथै अन्य केहीले बन्द सूची बुझाएका छैनन् ।
बन्द सूची नबुझाउनेमा पूर्व प्रधानमन्त्री सुर्यबहादुर थापाको पार्टी राष्ट्रिय जनशक्ति पार्टीलेसमेत बुझाएको छैन ।आन्दोलनमा रहेको संयुक्त मधेशी मोर्चाले आफ्नो सबै माग सात दलीय सरकारले सम्बोधन पुरा नगरेकाले आज बन्द सूची नबुझाउने बताएको छ। एक मधेश एक प्रदेशबाहेकका सबै माग पुरा गर्ने प्रतिवद्धता भने सात दलले शनिबार जनाएको थियो ।आधाजसो जनसंख्या आन्दोलनमा रहेका बेला निर्वाचन सम्भव नहुने भन्दै बन्द सूची नबुझाउने निर्णय गरेको राष्ट्रिय जनशक्ति पार्टीले आफ्नो अडान कायमै राखेको छ ।
प्रमुख मधेशवादी दलले बन्द सूची नबुझाउने भएपछि चैत २८ गतेका लागि निर्धारित संविधानसभा निर्वाचनमासमेत आशंका सिर्जना भएको छ।यद्यपि तराई र केही पहाडी जिल्लामा आन्दोलनरत संघीय गणतान्त्रिक राष्ट्रिय मोर्चा र सरकारबीच आजको वार्ता सकारात्मक भए मोर्चामा आवद्ध दलहरुले बन्द सूची बुझाउन सक्ने संकेत दिएका छन् । आयोगमा दर्ता भएका ७४ दलमध्ये ३७ वटा दलले मात्रै फागुन ८ गते बन्द सूची बुझाएका थिए ।
यसैबीच निर्वाचन आयोगले आज साँझदेखि समानुपातिक प्रणालीका लागि मतपत्र छाप्ने काम सुरु गर्ने भएको छ। आयोग स्रोतकाअनुसार झण्डै दुई करोड मतपत्र छाप्ने योजना रहेको छ। मतपत्र छाप्ने जिम्मा जनक शिक्षा सामग्री केन्द्रले पाएको छ।