तराईमा विजय जुलुस निकालिदै, गणतान्त्रिकको बन्द कायम

तराईमा विजय जुलुस निकालिदै, गणतान्त्रिकको बन्द कायम

सरकार र संयुक्त लोकतान्त्रिक मधेशी मोर्चाबीच आठ बुँदे सम्झौता भएपछि खुसियाली मनाउँदै शुक्रबार तराईका विभिन्न जिल्लामा विजय जुलुस निकालिने भएको छ। मोर्चा निकट दलका नेता तथा कार्यकर्ताले तराईका विभिन्न जिल्लाहरुमा र्‍याली निकाल्न लागेका हुन् ।सम्झौता भएको खुसियालीमा बिहीबारदेखि नै तराईमा दिपावलीका साथ विजय र्‍याली निकाल्न सुरु गरिएको थियो । सरकार र मोर्चाबीच बिहीबार ८ बुँदे सम्झौता भएको थियो । सम्झौतालगत्तै मोर्चाले १६ दिनदेखि मधेशमा जारी आमहड्ताल फिर्ता लिएको छ।मोर्चाले आन्दोलन फिर्ता लिएपछि लामो समयदेखि प्रभावित तराईको जनजीवन सामान्य बनेको छ। बजार, पसल, शैक्षिक संस्था, कलकारखाना, यातायात लगायत संचालनमा आएका छन् । सुनसरीको दुहवी-सोनापुर खण्डमा लगाइएको अनिश्चितकालीन कर्फ्यु बिहान ९ बजेसम्म खुकुलो पारी पुनः जारी गरिएको छ। कर्फ्यु खुकुलो पारिएको समय पारेर आन्दोलनका क्रममा मृत्यु भएका मोहम्द विस्कुट मियाँको अन्त्यसष्टि गरिएको छ।यसैबीच मधेशी मोर्चाले आन्दोलन फिर्ता लिए पछि संघीय गणतान्त्रिक राष्ट्रिय मोर्चाको आन्दोलनका कारण पूर्वी तराई तथा पहाडी भेगको जनजीवन पूर्णतः सामान्य बन्न सकेको छैन । झापा पूर्वबाट काठमाडौका लागि अझै पनि सवारी साधन छट्न सकेका छैनन् ।यता सर्लाहीको नवलपुरमा मोर्चाका कार्यकर्ताले शुक्रबार बिहान एउटा ट्रक र ट्याक्टरमा आगजनी गरेका छन् । उनीहरुले बन्द अवज्ञा गरेको भन्दै नारायणगढबाट धरान जाँदै गरेको ट्रक र उखु ढुवानी गरेर फर्केको ट्याक्टरमा आगजनी गरेका हुन् । ट्रकमा पेट्रोल बम प्रहार गर्दा एक महिला घाइते भएकी छन् । संघीय गणतान्त्रिक मोर्चाले आफ्नो पकड रहेको क्षेत्रमा गत फागुन १ गतेदेखि आम हड्ताल गर्दै आएको छ।